أولا: المشروبـــات
المشروبات الأساسية في الضيافة هي الشاي والقهوة العربية والعصير طبعا غير الماي والمشروبات الغازية في وقت العشا
العصاير: في قاعات وايد تعطي خدمة العصاير في الأستقبال يعني بداية العرس لكن للاسف في ناس ما تسأل هي حق شنو دافعه أصلا ويفضل أن العصير يكون توزيعه في بداية العرس, يعني فتره الأستقبال الي أصلا أهل العرس بيكونون واقفين عند الباب يستقبلون فلازم شي يشغل الناس بهالفتره والعصير شي حلو منعش والأحلى ان تكون هالفتره بدون مشروبات حارة لانها أصلا بتكون بالكثير ساعه.
الشاي والقهوة: وهاي اهم شي بالعرس خصوصا إذا كان العرس بوفية ورجاء لحد يأخذ ضيافة الشاي والقهوه من أي مكان لانه في مضيفات أصلا ما يدرون عن العرس ولا يضيفون حد واذا الميزانية ما تسمح يفضل أن اتكون على الطاولات دلة شاي ودلة قهوه أضمن للكل خصوصا اني أروح أعراس وايد والمضيفات ما أيكونون اوكي ومب محللين القيمة الي خذوها على خدمتهم التعيسه.
ثانيا: الحلويــات والموالــح
نفس الشي, ما راح أقدر أتكلم عن المأسي الي أتصير في الأعراس من ناحية الحلويات والموالح بس بتكلم عن طرق أتسهل عليكم الاختيارات, وقبل كل شي أنا ضد أن أتكون الموالح والحلويات على الطاولة لانه ما قد رحت عرس ولقيتهم مخلصين كله نطلع وهم في مكانهم عكس الصواني الي تقدر العروس أتوزعها على أهلها عقب العرس.
الحلويات:
الكل يحتار شنحط ونبي شي جديد, أوكي شي جديد بس في أشياء أساسية لازم تنحط الي هي التمور, البيتيفور, والشكولاته.
الموالح:
يفضل بالموالح يكون كل شي من الحجم الصغير, ومب مستحب أن أتكون من الموالح الناشفة يفضل أن تكون فطاير أو سندويشات أو مقبلات صغيرة لانه الموالح الناشفة أصلا مب محبوبه وايد, وممكن بعد المكسرات لأنه الغالبية أتحبها ممكن تنحط في أكواب صغيره مزينه وأتوزع.
ترتيـــب التـــوزيعــــات:
1- يفضل فالأستقبال أن يقدمون العصير مع صواني البيتيفور خصوصا أن العرس توه ما بدا فلازم شي الناس أتسلى فيه.
2- بعد ساعة الأستقبال يبدا توزيع القهوة مع صواني الشوكلاته والتمر
3- بعد القهوة يبدأ توزيع الشاي وصواني الموالح.
هاي الترتيب يناسب الي عشاهم على الطاولات أو بوفية لكن ممكن الي عشاهم بوفية وراح يتأخر أن يعيدون ضيافة القهوة والشاي مرتين بدال مره.
صوانـــي الضيــافــــة:
من كل نوع لازم صينتين لأنه غالبا العرس يكون مقسوم نصين وبالنص الكوشه والستيج
يفضل أن كل صينيه يكون في نوع واحد أو على الأقل حجم واحد
طبعا هالصوره غلط وللأسف أغلب محلات الضيافة يترسون الصواني بهالطريقة, وأختلاف النوعيات يخلي الضيف يحتار ويستحي أن يتأخر وهو يفكر شنو ياخذ فيعتذر من المضيفة وما يتضيف وتروح فلوس الصواني على الفاضي
يستحسن أن الصواني أتكون بهالشكل وبالعكس هالطريقة بتخلي الكل يتضيف وبسرعه بدور الصواني وبتخفف عليكم الدوارة من محل لمحل لانه بتحطون كل نوع في صينيه فممكن تترسون 4 صواني من محل واحد
توزيعات بعد العشاء:
طبعا بعد العشا في ناس وايد أتفنن ممكن ايتوزع كابتشينو, قهوة تركية, مشروبات حارة, هوت شوكلت وغيره وهالفتره مفتوحه على حسب عادات أهل العرس وتقاليدهم وبتكلم في موضوع ثاني بس عن توزيعات بعد العشاء بالتفصيل.
وبالعافية عليكم وعلى معازيمكم وأن شاء الله أتكون ضيافتكم حلوة ولذيذه وأتبين وما أدمر ميزانيتكم في نفس الوقت ^__^
